Актанышның үзәге — Ленин проспекты — җәй айларында соклангыч роза гөлләре белән балкып тора. Район үзәгенә аерым бер ямь өстәүче бу матурлык, әлбәттә, үзеннән-үзе генә барлыкка килми. Чәчәкләрне тәрбияләп, карап, аларга «җан өрүче» тырыш хезмәткәрләребез бар.
Бүген дә «Коммунсервис-Актаныш» муниципаль унитар предприятиесе чәчәкчеләре — Җәмилә Шәйгәрдәнова, Алмазия Сәрвәрова һәм Әлфия Габдуллина Ленин проспектында роза куакларын карау һәм тәртипкә китерү эшләре белән мәшгуль иделәр. Алар куак төпләрен чистарта, корыган һәм искергән ботакларны кисеп ала, үсемлекләргә яңадан көч кертә.
«Розаларны кичәге көннән үк тәрбияли башладык. Бу эш куаклар тагын да куерак, матуррак чәчәк атсын өчен башкарыла. Искергән ботакларны кисеп, яңарыш өчен шартлар тудырабыз. Бүген кичкә кадәр эшне тәмамларга уйлыйбыз», — дип уртаклаштылар хезмәткәрләр.
Чәчәкчеләрнең эше моның белән генә тәмамланмый. Ленин проспектындагы эшләрне төгәлләгәннән соң, алар райондагы боҗралы юл чатында яшелләндерү һәм утау эшләрен дәвам итәчәк.
Актанышыбызны матур, чиста һәм төзек итүгә зур өлеш кертүче, үз хезмәтләрен яратып башкаручы апаларыбызга ихлас рәхмәт сүзләрен җиткерәбез. Чыннан да, һәр кечкенә хезмәт тамчысы бергә кушылып, районыбызның зур бер матур картинасын тудыра.